Beki wa kulia wa Yanga, Yao Kouassi Attohoula, amewataka mashabiki wa klabu hiyo kutoikatia tamaa timu yao, huku akiwaomba kudumisha umoja na mshikamano kufuatia kipigo cha kwanza cha msimu walichokipata kutoka kwa watani wao wa jadi, Simba SC.
Yanga walipoteza mchezo huo wa Dabi ya Kariakoo kwa kufungwa Mabao 2-1 dhidi ya Simba SC katika mchezo uliopigwa siku ya Jumamosi, Oktoba 10, 2026, kwenye Uwanja wa Uhuru jijini Dar es Salaam.
Matokeo hayo yalisitisha rekodi ya Yanga ya kushinda mechi zote sita za kwanza za Ligi Kuu ya NBC msimu huu.
Kupitia ujumbe alioweka kwenye ukurasa wake wa mtandao wa kijamii, Yao alikiri kuwa matokeo hayo yameleta maumivu makubwa lakini akasisitiza kuwa ni sehemu ya mchezo wa soka na sasa akili zao zote zimeelekezwa katika kujiimarisha na kuwa bora zaidi.
“Kushindwa kunauma, lakini ni sehemu ya mchezo. Jana imepita, tumekubali makosa yetu mbalimbali ili tujifunze na kufanya vizuri zaidi. Tusikate tamaa maadamu bado tunapumua. Tuendelee kuwa kitu kimoja, tushikamane na kupambana pamoja,” alisema Yao.
Kikosi cha Yanga leo kinatarajiwa kurejea mazoezini kuanza maandalizi ya mchezo wa ligi ya mabingwa dhidi ya CFFA utakaopigwa Jumamosi Oktoba 17 kwenye uwanja wa Azam Complex.
