Aliyekuwa kiungo mshambuliaji wa Yanga, Celestin Ecua, ameibukia nchini Saudi Arabia baada ya kujiunga na klabu ya Al-Shoulla FC, inayoshiriki Ligi Daraja la Pili ya Saudi Arabia.
Hatua hiyo inafungua ukurasa mpya katika maisha ya soka ya Ecua baada ya kipindi kifupi cha kukumbukwa kwa kiwango tofauti akiwa Yanga, ambako alifika akiwa na matarajio makubwa lakini hakufanikiwa kupata nafasi ya kudumu katika kikosi cha mabingwa hao wa Tanzania.
Ecua, raia wa Chad, alijiunga na Yanga mwaka 2025 akitokea soka la Ivory Coast, ambako alikuwa ameng'ara na kuvutia vilabu kutokana na uwezo wake katika eneo la ushambuliaji.
Akiwa Yanga, hata hivyo, mambo hayakwenda kama ilivyotarajiwa. Katika kipindi chake cha takribani miezi sita, alicheza mechi nane na kufunga bao moja, kabla ya klabu hiyo kumtoa kwa mkopo kwenda JS Kabylie ya Algeria katika dirisha dogo la usajili Januari 2026.
Uamuzi huo ulikuja baada ya Ecua kushindwa kupata nafasi ya kudumu katika kikosi cha Yanga. Akiwa JS Kabylie, changamoto iliendelea, kwani alicheza mechi 10 lakini alianza michezo mitatu pekee na kutumia jumla ya dakika 283, huku akifanikiwa kutoa asisti moja bila kufunga bao.
JS Kabylie haikuwa tayari kutumia kipengele cha kumnunua mchezaji huyo moja kwa moja kutokana na kiwango chake, huku Yanga nayo ikiamua kuachana naye.
Ecua sasa amepata kituo kipya Saudi Arabia, ambako atavaa jezi ya Al-Shoulla na kuanza safari nyingine ya kujaribu kufufua maisha yake ya soka.
