Yanga imemaliza kibabe hatua ya makundi michuano ya ligi ya mabingwa barani Afrika ikiifumua JS Kabylie mabao 3-0 katika mchezo uliopigwa uwanja wa New Amaan Complex.
Unaweza kusema vijana wa kocha Pedro Goncalves hawana deni kwani leo walipambana tangu dakika ya kwanza kusaka ushindi huo na pengine mechi ilipaswa kuisha kwa Yanga kufunga mabao mengi zaidi.
Alikuwa ni Pacome Zouzoua aliyetengeneza nafasi ya bao la kwanza baada ya kufanyiwa madhambi eneo la hatari na mwamuzi Jacques Ndala kuamuru mkwaju wa penati uliowekwa kambani na Depu.
Hata hivyo Pacome alishindwa kuendelea na mchezo baada ya kuumia na nafasi yake kuchukuliwa na Mudathir Yahya.
Yanga ilikwenda mapumziko ikiwa mbele kwa bao 1-0 wakirejea kipindi cha pili wakiwa na ari kubwa zaidi na kufanikiwa kufunga mabao mwengine mawili kupitia kwa Depu na Chadrack Boka.
Ni ushindi ambao hata hivyo haujatosha kuipeleka Yanga robo fainali baada ya mchezo kati ya Al Ahly dhidi ya AS FAR kumalizika kwa matokeo ya suluhu ya bila kufungana.
Yanga imemaliza nafasi ya tatu kundi B ikifikisha alama nane huku AS FAR wakimaliza nafasi ya pili na alama 9, Al Ahly wakiongoza kundi na alama 10.
Matokeo ya mchezo dhidi ya Al Ahly uliomalizika kwa sare ya bao 1-1 nyumbani unaweza kusema ndio yaliyovuruga hesabu za Yanga kutinga robo fainali.
Lakini ni wazi Yanga imepambana katika kundi gumu, na sasa inapaswa kuendeleza kasi hii kwenye mashindano ya ndani ili kuhakikisha inashinda kila taji.
