Kikosi cha Yanga leo kitashuka uwanja wa KMC Complex saa 1 usiku kuikabili Dodoma Jiji katika mwendelezo wa ligi kuu ya NBC.
Ni ratiba ngumu kwa Wananchi kwani wamepumzika siku moja tu tangu warejee kutoka Misri ambao walicheza mechi ya ligi ya mabingwa dhidi ya Al Ahly.
Kocha Msaidizi wa Yanga Patrick Mabedi amesema hakukuwa na muda wa kutosha kujiandaa na mchezo huo lakini wana kikosi kipana, matumaini yao ni kufanya vyema katika mchezo huo.
Timu zilitaarifiwa mapema kuwa tayari kukabiliana na ratiba ngumu baada ya kumalizika kwa michuano ya Afcon 2025.
Ligi zote zinapaswa kumalizika mwishoni mwa mwezi May ili kupisha michuano ya kombe la Dunia 2026 inayotarajiwa kuanza mwezi Juni.
Baada ya mchezo huo Yanga itaelekea visiwani Zanzibar kukamilisha maandalizi ya mchezo wa ligi ya mabingwa dhidi ya Al Ahly utakaopigwa Jumamosi, Januari 31 uwanja wa New Amaan Complex.
