Mabingwa wa soka Tanzania Bara Yanga leo watakuwa dimba la New Amaan Complex visiwani Zanzibar kuikabili Singida Black Stars kwenye mchezo wa nusu fainali kombe la Mapinduzi.
Mtanange huo unaosubiriwa kwa hamu na mashabiki wa soka nchini, utapigwa kuanzia saa 2:15 usiku.
Jana Azam Fc walitangulia fainali baada ya kuichapa Simba bao 1-0 katika mchezo mwingine wa nusu fainali.
Mshindi wa mchezo wa leo atachuana na Azam Fc kwenye fainali itakayopigwa Januari 13 Gombani, Pemba.
Ni wazi haitakuwa mechi nyepesi lakini mkufunzi wa Yanga Pedro Goncalves amesema vijana wake watapambana ili kuhakikisha wanatinga fainali.
Goncalves analisaka taji lake la kwanza akiwa na Yanga, akirithi mikoba iliyoachwa na Romain Folz ambaye licha ya kuwatumikia Wananchi kwa muda mfupi aliwapa taji la Ngao ya Jamii.
