Mabingwa wa soka Tanzania Bara, Yanga leo wanaanza kampeni ya kusaka ubingwa wa nne mfululizo ligi kuu ya NBC kwa kuikabili Kagera Sugar katika mchezo utakaopigwa uwanja wa Kaitaba
Mtanange huo unaosubiriwa kwa hamu na mashabiki wa soka nchini, utapigwa kuanzia saa 11 jioni
Mabadiliko ya muda wa mchezo huo yalithibitishwa na Bodi ya Ligi jana baada ya maombi ya Azam TV ili kuhakikisha mashabiki watakaofuatilia mchezo huo kupitia televisheni wanapata picha bora
Yanga ilitua Kagera jana na jioni vijana wa kocha Miguel Gamondi wakapata nafasi ya kufanya mazoezi ya mwisho katika uwanja wa Kaitaba
Ni wazi itakuwa mechi ngumu yenye upinzani mkali kwani Kagera Sugar hawajawahi kuwa wapinzani wepesi wanapocheza na Yanga hasa katika uwanja wa Kaitaba
Katika mchezo huo Yanga itawakosa wachezaji Yao Kouassi na Farid Mussa ambao ni majeruhi huku kiungo Khalid Aucho akirejea baada ya kupona changamoto ya misuli
Ni mwanzo wa msimu mwingine kwa Yanga, Wananchi wakiwa na matarajio makubwa kwa timu yao ambayo tayari imeonyesha ubora mkubwa kuanzia pre-season, Ngao ya Jamii na mechi za awali ligi ya mabingwa
