Mshambuliaji wa Yanga Ditram Nchimbi amesema hafurahii hali ya kutofunga mabao lakini jambo hilo halimsumbui hasa pale timu inapokuwa inafanya vizuri
Nchimbi aliyetua Yanga msimu uliopita akitokea klabu ya Azam Fc, wakati huo akicheza kwa mkopo Polisi Tanzania, amesema presha ya mashabiki haipaswi kumuondolea umakini katika kutimiza majukumu yake
"Timu hizi mbili (Yanga na Simba) zina presha sana, siku zote mashabiki wanataka ufanye vizuri tu. Wakati wote uwe tayari kutukanwa pale unapofanya vibaya lakini siku ukifanya vizuri watakusifu na kukupongeza"
"Muhimu ni kwa mchezaji kufahamu hali hiyo na kuweka juhudi kwa kile unachokifanya ili usitoke mchezoni"
"Nafahamu sijafunga muda mrefu lakini hilo halinisumbui kwani kitu muhimu kwangu ni kuisaidia timu iweze kupata matokeo. Kama nitafunga mimi ni vizuri lakini hata akifunga mwenzangu ni vizuri, jambo muhimu hapa ni timu kufanya vizuri," alisema Nchimbi
Nchimbi ana takribani mwaka mmoja hajafunga bao, ingawa katika kikosi cha Yanga amekuwa akitumika kimkakati zaidi
Katika msimu wake wa kwanza Yanga, Nchimbi alifunga mabao sita, msimu huu ametoa pasi mbili za mabao
