Mlinda lango wa Yanga Farouk Shikhalo ameeleza kushangazwa na taarifa zinazoenezwa kwenye mitandao ya kijamii kuwa amefanya mazungumzo na Simba ili ajiunge nao mkataba wake utakapomalizika na Yanga mwishoni mwa msimu
Mkenya huyo aliyeonyesha umahiri langoni katika mchezo uliopita dhidi ya Mtibwa Sugar, amesema hajafanya mahojiano na chombo chochote cha habari hivyo taarifa hizo ni uzushi wa mitandaoni
Amesisitiza kuwa yeye ni mchezaji wa Yanga, bado ana mkataba na mabingwa hao wa kihistoria na anaheshimu mkataba wake
"Ninapenda kuomba radhi juu ya taarifa zinazoenea kwenye baadhi ya vyombo vya habari na mitandao ya kijamii kuwa kuna mazungumzo nimefanya nao kuhusu mkataba wangu na taarifa za mazungumzo na baadhi ya timu"
"Naomba nikanushe kuwa sikufanya mazungumzo na kituo chochote cha radio wala timu yoyote Mimi ni mchezaji wa Yanga na bado ninamkataba nao na nawaheshimu wajiri wangu," amefunguka Shikhalo
Taarifa iliyoenea mtandaoni, imebainisha kuwa mtangazaji wa eFM Sudi Mkumba ndiye aliyedai kuwa kipa huyo wa Kimataifa ambaye hudakia Harambee Stars atahamia Simba mwishoni mwa msimu
