Carlos Carlinhos jana aliwapa furaha mashabiki wa Yanga akifunga bao muhimu lililoihakikishia Yanga ushindi wa bao 1-0 dhidi ya Mtibwa Sugar
Ni ushindi ambao umewafanya Wananchi wazidi kujichimbia kileleni wakifikisha alama 49, alama saba dhidi ya Simba inayoshika nafasi ya pili
Carlinhos alihitaji dakika 20 tu kufanya mambo adimu ambayo yalikosekana katika dakika 70 kabla ya yeye kuingia
Mikimbio yake ilikuwa changamoto kwa mlinzi wa kulia wa Mtibwa Sugar Hassan Kessy ambaye mara kadhaa alijikuta akiramba nyasi huku Carlinhos 'akisepa' na gozi la n'gombe
Alipoweka bao kambani, Carlinhos hakushangilia, bila shaka ilikuwa ujumbe kwa kocha Cedric Kaze kuwa anataka muda zaidi wa kucheza
Pengine benchi la ufundi linahofia kumtumia muda mrefu kwani ametoka katika majeraha yaliyomuweka nje kwa zaidi ya miezi mitatu
Lakini Carlinhos ni mchezaji aliyekamilika sana kiufundi, huyu unaweza kumuweka daraja moja na Saido Ntibazonkiza
Katika michezo sita aliyoanza kwenye kikosi cha Yanga, Carlinhos amehusika kwenye mabao matano, akifunga mabao matatu na kutoa pasi za mabao mawili
Kwa namna yoyote kama yuko kwenye afya nzuri, Kocha Cedric Kaze anakosa sababu ya kutomtumia
