Ukiwaondoa Saido Ntibazonkiza na Yacouba Songne ambaye pamoja na kuanza mazoezi bado hajawa fiti, kocha mkuu wa Yanga Cedric Kaze leo atakuwa na kikosi chake kamili wakati atakapoikabili Mtibwa Sugar katika mchezo utakaopigwa uwanja wa Benjamin Mkapa
Mabadiliko pekee yanayoweza kushuhudiwa leo ni katika eneo la ushambuliaji ambalo ndilo linaloonekana kuwa na changamoto zaidi
Fiston Abdul Razak anaweza kurejeshwa kikosini kuongeza nguvu katika eneo hilo ambalo pia Ditram Nchimbi anaweza akapewa nafasi ya kuanza mbele ya Michael Sarpong
Nchimbi amekuwa na faida ya 'ku-press' walinzi wa timu pinzani pamoja na kuwa umakini wake ni mdogo katika kutumia nafasi kupachika mabao
Deus Kaseke aliyefunga mabao sita, ndiye anayetizamwa zaidi kuendelea kuifungia Yanga mabao
Kaseke amekuwa na kiwango kizuri sana msimu huu akisahihisha makosa ya safu ya ushambuliaji kwa kufunga mabao kila anapopata nafasi
Carlos Carlinhos alikosa mchezo uliopita, pengine leo anaweza kuwa na dakika zake
Umuhimu wa Carlinhos unafahamika hasa kwa mipira ya adhabu. Tangu apone majeraha Kaze hamtumii sana katika kikosi chake
Lakini kwa timu inayohitaji ushindi, Carlinhos ni mchezaji muhimu kwani anaweza kuifanya mipira ya kona na adhabu kuwa nafasi adimu zinazoweza kuipa Yanga mabao
Katika mchezo wa kwanza dhidi ya Mtibwa Sugar ambao ulipigwa mkoani Morogoro, mpira wa kona wa Carlinhos ndio uliozaa bao pekee la Yanga lililofungwa na nahodha Lamine Moro
Msimu huu amefunga mabao mawili na kutengeneza mabao mawili katika mechi alizocheza mwanzoni mwa msimu kabla ya kupata majeraha yaliyomuweka nje kwa muda mrefu
Ni mchezo ambao kocha Cedric Kaze anapaswa kuchanga karata zake vyema kuhakikisha timu yake inaweza kupata ushindi
