Kiungo wa Yanga Mcongomani Mukoko Tonombe amesema ni jukumu lao wachezaji kuhakikisha wanashinda mechi na kutimiza malengo yao ya msimu huu
Mukoko ambaye juzi alionyesha kukerwa na waamuzi wa mchezo dhidi ya Mbeya City, amesema pamoja na kuwepo kwa changamoto ya waamuzi akitolea mfano wa kunyimwa penati ya wazi, amesisitiza ni muhimu wao wachezaji kuhakikisha wanatumia nafasi nyingi wanazotengeneza
"Ni jukumu letu sisi wachezaji kuhakikisha tunashinda ili kuwapa furaha mashabiki. Tunapaswa kuongeza umakini hasa kwa safu ya ushambuliaji tutumie vyema nafasi tunazotengeneza"
"Tunapoteza nafasi nyingi sana, tukizitumia nafasi hizo hatuwezi kukosa ushindi hata inapotokea waamuzi wakatukwamisha. Ili mashabiki wetu wafurahi tunapaswa kushinda mechi. Tukiwa tunafunga mabao mengi hata timu pinzani tutakuwa tunazipunguza nguvu" alisema Mukoko
Vinara hao wa ligi kuu watakuwa na nafasi ya kusahihisha makosa keshokutwa Jumatano wakati watakaposhuka katika uwanja wa Benjamin Mkapa kuikabili Kagera Sugar katika mchezo mwingine wa kukata na shoka
Huu ni mchezo ambao matokeo tofauti na ushindi yataweza kuwaongezea presha wachezaji na benchi la ufundi
