Makamu Mwenyekiti wa Yanga Fredrick Mwakalebela amesema leo hawatakuwa na 'simile' kwenye mchezo wa fainali kombe la Mapinduzi dhidi ya watani zao Simba kwani wanahitaji kuanza kuhesabu mataji
Akizungumza kutoka visiwani Zanzibar mapema leo, Mwakalebela amesema wamefurahi mchezo wa fainali kuwakutanisha na watani zao kwani walihitaji nafasi hii kudhihirisha ubora wao
"Tumefurahi mchezo wa fainali tunacheza na watani zetu Simba, tulikuwa tukiwawinda kwelikweli hatimaye wameingia kwenye anga zetu. Viongozi tumezungumza na wachezaji kuwaeleza umuhimu wa kushinda leo na kutwaa ubingwa wa kombe la Mapinduzi. Wametuahidi, wako tayari kufia uwanjani ili mradi tu wahakikishe tunashinda ubingwa leo"
"Kwa misimu mitatu timu yetu haikushinda kikombe chochote hivyo leo tumepania kuanza kuhesabu mataji ya msimu huu. Tunaanza na hili la Mapinduzi, kisha ligi kuu na kombe la FA"
"Mashabiki wetu waje kwa wingi uwanjani kuwapa hamasa wachezaji wetu, nawaambia leo watarudi nyumbani wakiwa na furaha," alisema Mwakalebela
Mpaka kufikia saa kumi jioni uwanja wa Amaan tayari umefurika mashabiki kuelekea mchezo huo utakaopigwa kuanzia saa mbili na robo usiku
