Kesho Ijumaa Yanga inakamilisha mechi yake ya pili michuano ya kombe la Mapinduzi wakitarajiwa kuikabili Namungo Fc katika mchezo utakaopigwa saa mbili na robo usiku
Juzi Yanga ililazimishwa suluhu ya bila kufungana na Jamhuri Fc matokeo ambayo yameweka rehani nafasi yao ya kutinga nusu fainali
Yanga inahitaji kushinda mchezo dhidi ya Namungo Fc ili kujihakikishia kucheza nusu fainali. Matokeo ya sare pia yanaweza kuipeleka Yanga nusu fainali kupitia 'best looser' kutegemeana na matokeo ya makundi mengine
Katika mchezo wa kesho, kocha Cedric Kaze anatarajiwa kumtumia kiungo wake mshambuliaji Saido Ntibazonkiza aliyepumzishwa mchezo uliopita
Mchezo huo unatarajiwa kuwa na ushindani mkali kwani Namungo Fc wameimarika sana kutokana na ushiriki wao katika michuano ya kombe la Shirikisho barani Afrika
Wamerejea jana kutoka Sudan ambako walifanikiwa kutinga raundi ya pili ya michuano hiyo baada ya kuiondosha Al Hilal Obeid kwa ushindi wa jumla wa mabao 5-3
Lakini pia Yanga na Namungo Fc ziligawana pointi baada ya kutoka sare ya 1-1 katika mchezo wa ligi duru ya kwanza
