Ni uhakika Yanga itaweza kumtumia mshambuliaji wake mpya Saido Ntibazonkiza kwenye mchezo wa ligi kuu dhidi ya Dodoma Jiji ambao utapigwa kesho Jumamosi uwanja wa Sheikh Amri Abeid mkoani Arusha
Yanga imekamilisha vibali vya mchezaji huyo wakati TFF ikitarajiwa kutoa leseni kumuwezesha kushuka dimbani hapo kesho
Nyota wa Yanga akiwemo Ntibazonkiza wamekuwa gumzo kwa mashabiki mkoani Arusha kuelekea mchezo dhidi ya Dodoma Jiji hapo kesho Jumamosi
Kocha Mkuu wa Yanga Cedric Kaze amesema anaamini nyota huyo raia wa Burundi ataongeza ubunifu na uzoefu wake utakuwa msaada mkubwa katika kikosi chake
Juzi baada ya mchezo wa kirafiki dhidi ya Singida United, Kaze alieleza kuridhishwa na kiwango alichoonyesha Ntibazonkiza akimsifu kuwa amefanya kile ambacho kila mmoja alikitarajia kutoka kwake
Katika mchezo huo uliokuwa wa kwanza kuitumikia Yanga, Ntibazonkiza alifunga mabao mawili
"Ni mchezaji mzuri ameonesha kile tulichotarajia, anajua kuchezesha timu na kuongoza wenzake uwanjani," alisema Kaze
Mwenyewe Ntibazonkiza amesema amekuja kutumia uzoefu wake kuisaidia Yanga akishirikiana na wanachezaji wenzake kuhakikishia watafikia malengo yaliyokusudiwa ya kutwaa ubingwa
