Wananchi wametakata uwanja wa CCM Kambarage mkoani Shinyanga wakiibuka na ushindi wa kishindo kwa kuwafunga Mwadui Fc mabao 5-0 katika mchezo wa ligi kuu ya Vodacom
Yanga sasa imeanza kuwapa furaha mashabiki, kandanda safi na mabao yakianza kufurika
Kikosi cha kocha Cedric Kaze kilitawala mchezo huo kwa muda mwingi, wakienda mapumziko wakiwa mbele kwa mabao 2-0 yaliyofungwa na Deus Kaseke na Yacouba Sogne
Kaseke na Sogne wameendelea kuinogesha Yanga kwani ushirikiano wao dimbani kwa mara nyingine umeinufaisha Yanga
Kaseke alifunga bao lake la tatu kwa pasi ya Sogne ambaye hiyo ilikuwa assist yake ya tatu kwa Kaseke
Aidha Sogne leo alikuwa mwiba mkali kwa safu ya ulinzi ya Mwadui, ndiye aliyeongeza bao la tatu mwanzoni mwa kipindi cha pili, likiwa ni bao lake la pili siku ya leo
Mabao mengine ya Yanga yalifungwa na Tuisila Kisinda na nahodha Lamine Moro aliyemalizia krosi murua ya Farid Mussa
Ulikuwa ni mchezo ambao Wananchi walicheza kwa mamlaka, hakika kikosi hiki kukifunga utahitaji kufanya kazi ya ziada
Ushindi huo unawaimarisha kileleni mwa msimamo wa ligi wakifikisha alama 37
Mchezo unaofuata ni Jumamosi ijayo dhidi ya Dodoma Jiji, utapigwa uwanja wa Sheikh Amri Abeid mkoani Arusha
