Yanga yawanyemelea Juuko, Mzamiru

Wachezaji wawili wa Simba, kiungo Mzamiru Yassini na beki Juuko Murshidi wako mwishoni mwa muda wa mikataba yao na klabu hiyo.

Wachezaji hao mikataba yao imebaki chini ya miezi sita hivyo wanaruhusiwa kufanya mazungumzo ya awali na timu yoyote.

Mzamiru anaweza kuwa mbadala sahihi wa Thabani Kamusoko kama kiungo huyo raia wa Zimbabwe anayetibiwa majeraha ya goti atashindwa kupona kwa wakati.

Ikumbukwe Yanga inakabiliwa na michuano ya klabu bingwa barani Afrika na michuano hiyo ndio kipaumbele cha kwanza msimu huu.

Hivyo inahitaji kuingia kwenye michuano hiyo ikiwa na kikosi kamilifu.

Juuko Murshidi ni beki mzoefu. Amecheza mechi nyingi za Kimataifa akiwa na kikosi cha timu ya Taifa ya Uganda Cranes.

Ana bahati mbaya tu haaminiwi na kocha wa Simba Joseph Omog lakini uzoefu wake si wakutiliwa shaka hata kidogo.

Kwa timu inayoshiriki michuano ya kimataifa, huyu ni mtu sahihi kuwa nae.

Hata hivyo kama Yanga itafanikiwa kufikia nao makubaliano, wachezaji hawa watatua baada ya mikataba yao na Simba kumalizika.

Yanga na Simba haziuziani wachezaji wenye mikataba hai!

Vita ya kupokana wachezaji baina ya Yanga na Simba haijaanza leo na haitakwisha.

Jambo hili halipendwi na mashabiki hasa wale wa timu inayopoteza mchezaji lakini kwa mchezaji ni neema kwake.

Mchezaji kazi yake ni kusakata soka hivyo hawezi kukataa kuhamia sehemu yenye maslahi zaidi kuliko hapo alipo.