Kiungo kiraka wa Yanga Deus Kaseke amesema juhudi, kujituma na kufuata maelekezo ya Mwalimu Cedric Kaze ndio sababu ya kuaminiwa katika kikosi cha kwanza
Kaseke aliibuka kuwa nyota wa mchezo katika mechi mbili zilizopita dhidi ya Azam Fc na JKT Tanzania akifanikiwa kuichangia Yanga alama sita baada ya kufunga bao la ushindi katika kila mchezo
Ni huyuhuyu Kaseke ambaye awali hakuonekana kuwa mchezaji muhimu katika kikosi cha Yanga. Lakini tangu alipowasili Kaze mambo yameanza kumnyookea
Aidha, Kaseke ametengeneza maelewano mazuri na mshambuliaji Yacouba Sogne ambaye ndiye aliyetengeneza mabao yake yote
Nyota huyo wa zamani wa klabu za Mbeya City na Singida United, ameeleza kutambua aina ya uchezaji wa Sogne na anaamini ataendelea kufunga kama wataendelea kutumika pamoja
"Mimi na Yacouba tumekuwa tukielewana hata tunapokuwa mazoezini, nishafahamu anacheza kwa mtindo gani, hata na yeye pia anafahamu mimi nachezaje
"Ndio maana mara nyingi mipira anayoshika inatoka kwangu, na mimi nikipata mpira kwenye eneo la hatari, mara nyingi huwa inatoka kwake.
"Naamini kama mwalimu ataendelea kutuamini, nitakuwa nafunga au kutengeneza nafasi nyingi za mabao ambayo yatatupa pointi ambazo sisi tunazihitaji kwa ajili ya kuwania ubingwa msimu huu," alisema
