Jana katika mchezo wa ligi kuu dhidi ya JKT Tanzania, Yanga ilikuwa bora sana kwenye kipindi cha kwanza
Ni katika kipindi hicho ilijipatia bao pekee lililowapa alama tatu kupitia kwa Deus Kaseke
Kipindi cha pili mabingwa hao wa kihistoria walipunguza kasi wakiwapa JKT Tanzania nafasi ya kurejea mchezoni na kutengeneza mashambulizi mengi langoni kwa Yanga
Akizungumza baada ya mchezo huo, kocha mkuu wa Yanga Cedric Kaze ameeleza kuwa hali hiyo ilitokana na uchovu wa wachezaji baada ya kucheza mfululizo pasipo kupata muda wa kutosha wa kupumzika
"Leo ni siku ya nane, tumecheza mechi tatu ndani ya kipindi hiki. Wachezaji asilimia kubwa ni hawahawa waliocheza mechi hizo. Ni wazi tumeathiriwa na uchovu," alisema Kaze
Aidha, Kaze alieleza kuridhishwa na kiwango kilichoonyeshwa na wachezaji wake kwenye kipindi cha kwanza lakini hakufurahishwa na nafasi nyingi walizotengeneza hawakuzitumia
Mchezo unaofuata wa Yanga ni Disemba 06 dhidi ya Ruvu Shooting vijana wa Charles Mkwasa ambao msimu huu wako moto kwelikweli
Angalau wachezaji watapata wiki moja ya kujiandaa na mchezo huo, bila shaka pia watarejea wakiwa hawana uchovu
