Kocha Mkuu wa Yanga Cedric Kaze amekiri kuwa kikosi chake bado kina changamoto kwenye baadhi ya maeneo na atatumia dirisha dogo la usajili kukiimarisha
Dirisha dogo la usajili litafunguliwa wiki tatu zijazo Yanga ikiwa tayari na uhakika ya huduma ya kiungo mshambuliaji Saido Ntibazonkiza ambaye alisajiliwa mwezi uliopita
Akizungumza juzi baada ya mchezo dhidi ya Namungo Fc ambao ulimalizika kwa matokeo ya sare ya bao 1-1, Kaze alibainisha mapungufu aliyoyaona
Hata hivyo akasisitiza kuwa kwa sasa bado hawawezi kuzungumzia ni maboresho gani watayafanya, muhimu ni kusubiri dirisha dogo litakapofunguliwa mwezi ujao
"Naweza kusema yapo maeneo ambayo tutahitaji kuongeza nguvu, ila sitaweza kuweka wazi kwa sababu nitawavunja moyo wachezaji niliokuwa nao wakati bado tuna michezo sita kabla ya dirisha la usajili kufunguliwa
"Ni kama tulikosa mwelekeo katika mechi tatu mfululizo tulizopata sare hivi karibuni. Tulifanya makosa ambayo yalitugharimu tusiweze kuondoka na ushindi, tumefanyia kazi changamoto hizo, tumejipanga kuhakikisha haturudii makosa mchezo unaofuata dhidi ya Azam Fc" alisema Kaze
Kesho Kaze atakuwa na nafasi nyingine ya kupanda kileleni mwa msimamo wa ligi kama atafanikiwa kuondoka na ushindi dhidi ya Azam Fc
