Ifikapo saa moja usiku wa leo, Yanga itakuwa pale uwanja wa Benjamin Mkapa kumenyana na Namungo Fc ukiwa ni mchezo wa ligi kuu ya Vodacom
Huu ni mchezo muhimu sana kwa mabingwa hao wa kihistoria kwani wanahitaji kuondoka na alama zote tatu ili kujikita kileleni mwa msimamo wa ligi
Ni wazi kocha Cedric Kaze ataingia kwenye mchezo huo akiwa na kikosi chake kamili
Yawezekana kile kikosi kilichoanza mchezo dhidi ya Simba, kikashuhudiwa tena leo pale kwa Mkapa
Metacha Mnata, Kibwana Shomari, Yassin Mustafa, Lamine Moro na Bakari Nondo Mwamnyeto, ndio wanaounda ukuta wa chuma wa Yanga
Feisal Salum 'Fei Toto' na Mukoko Tomombe wameunda pacha 'konki' pale eneo la kiungo wakati Farid Mussa na Tuisila Kisinda wao wameaminiwa sana wakishambulia kutokea pembeni
Pengine mabadiliko yanayoweza kutarajiwa ni kuingia kikosini kwa Carlinhos ambaye tangu aliporejea kutoka kwenye majeraha, kiwango chake kimemvutia Kaze
Safu ya ushambuliaji ya Yanga imekuwa ikiwategemea zaidi Michael Sarpong, Ditram Nchimbi, Yacouba Sogne na Waziri Junior, mfumo atakaotumia Kaze ndio utaamua nani aanze kati yao
Huu ni mchezo wa tatu Yanga inacheza na Namungo Fc kwenye ligi. Michezo miwili iliyopita timu hizo zilitoka sare. Yanga itakuwa ikisaka ushindi wake wa kwanza dhidi ya Namungo Fc katika mechi za ligi
