Saa nne usiku wa leo Ijumaa, timu ya Taifa ya Tanzania 'Taifa Stars' itashuka uwanjani ugenini nchini Tunisia kupepetana na wenyeji wao katika mchezo wa kuwania tiketi ya kufuzu fainali za michuano ya Afcon 2021
Huu ni mchezo muhimu sana kwa Tanzania, matokeo ya ushindi yanaweza kuiweka Stars katika nafasi nzuri ya kufuzu ikitokea watafanikiwa kushinda tena mchezo wa marudiano ambao utapigwa Novemba 17 uwanja wa Benjamin Mkapa
Juzi Libya ilipoteza mchezo nyumbani dhidi ya Guinea ya Ikweta na hivyo ushindi au hata sare kwa Stars itawarejesha katika nafasi ya pili kundi J
Hata hivyo hautakuwa mchezo mwepesi kwa Stars, Tunisia ndio vinara wa kundi J wakiwa wameshinda mechi zao zote mbili walizocheza
Ndio wanaopewa nafasi kubwa zaidi ya kufuzu wakiwa vinara kundi J
Etienne Ndayiragije kocha mkuu wa Stars amesema wamejipanga kuhakikisha wanapata matokeo katika mchezo huo, wakikosa ushindi hata alama moja itakuwa na faida kwao
Stars leo itamkosa mshambuliaji wake Mbwana Samatta ambaye ameshindwa kujiunga na timu baada ya kupata majeraha katika klabu yake ya Fernabahce
Stars iliweka kambi ya siku tatu Uturuki kabla ya safari ya Tunisia tayari kwa mchezo huo usiku wa leo
