Achana na ahadi ambazo GSM wamewaahidi wachezaji iwapo wataibuka na ushindi dhidi ya Simba leo, umoja wa mashabiki wa Yanga nao wameweka mezani zawadi kemkem kwa ajili ya wachezaji
Akizungumza na wanahabari jana, Msemaji wa Mashabiki wa Yanga Jimmy Msindo 'Kindoki' alisema kuwa wao kama mashabiki watatoa kitita cha Tsh Milioni moja kwa kila bao litakalofungwa kwenye mchezo huo
"Hapa mkononi tunazo fedha nyingi tu kwa ajili ya wachezaji wetu. Tunachotaka ni wao kutupa furaha tu siku ya kesho (leo). Tutanunua kila goli watakalofunga kwa Tsh Milioni moja. Wakifunga bao moja watapata Milioni moja, wakifunga bao tano watapata Milioni tano na fedha zitaongezeka hivyo hivyo kulingana na idadi ya magoli," alisema Msindo
"Lakini pia tunayo zawadi kubwa zaidi, mchezaji atakayefunga bao la mwisho tutamzawadia gari aina ya Toyota Subaru Impreza. Tunataka kila mchezaji atakayecheza awanie fursa hii ya kufunga bao la mwisho ili tumzawadie gari hili," aliongeza Kindoki
Hamasa ya mashabiki wa Yanga imekuwa kubwa kuelekea mchezo huu. Uimara wa kikosi chao unawapa mashabiki kila sababu ya kujiamini kuwa wataondoka na alama zote tatu
