Kocha Mkuu wa Yanga SC, Cedric Kaze amesema mkakati wake mkubwa ni kuhakikisha wanashinda mchezo wao wa Ligi Kuu dhidi ya Simba SC unaotarajiwa kuchezwa keshokutwa Jumamosi katika uwanja wa Benjamin Mkapa jijini Dar es salaam
Yanga ilirejea Dar es salaam juzi usiku wakitokea mkoani Mwanza ambako walilazimishwa suluhu ya bila kufungana dhidi ya Gwambina Fc
Katika mchezo huo kaze alifanya mabadiliko makubwa ya kikosi alichotumia, akiupigia hesabu mchezo dhidi ya Simba
Akizungumza baada ya mchezo juzi, Kaze alisema mchezo dhidi ya Simba ni mkubwa na wanahitaji kuwa na maandalizi mazuri
"Ni mechi kubwa sana na Watanzania wote watakuwa wanaiangalia, nina imani itakuwa mechi nzuri sana. Mimi na vijana wangu tutajipanga kushinda mechi hii," alisema Kaze
Mchezo unaozikutanisha Yanga na Simba mara nyingi huwa na presha kubwa kwa kuwa ndio mchezo unaotizamwa zaidi na mashabiki wa soka Tanzania na hata ukanda wa Afrika Mashariki
Kaze amesema wamepata nafasi ya kuwafuatilia wapinzani wao hivyo wanafahamu ni mbinu gani wataitumia ili kuweza kuondoka na alama zote tatu
