Keshokutwa Jumamosi, mabingwa wa kihistoria Yanga watakuwa Mara kuwakabili wenyeji wao Biashara United katika mchezo wa ligi kuu ya Vodacom raundi ya nane
Huu ni mchezo ambao kama Yanga watashinda, watapanda juu ya msimamo wa ligi kwani watawapiku Azam Fc wenye alama 21 wakiwa wamecheza mchezo mmoja zaidi ya Yanga
Azam Fc ilipoteza mchezo wa kwanza msimu huu kwa kufungwa bao 1-0 na Mtibwa Sugar katika raundi iliyopita
Hata hivyo mchezo dhidi ya Biashara United hautarajiwi kuwa mwepesi kutokana na ubora wa timu zote
Biashara United wanashika nafasi ya tatu kwenye msimamo wa ligi wakiwa wamejikusanyia alama 16 baada ya kushuka dimbani mara nane
Wamekuwa na mwenendo mzuri wanapocheza katika uwanja wao wa nyumbani, kati ya mechi tano walizoshinda, nne wamepata ushindi nyumbani
Lakini pia Yanga haijawahi kupata ushindi dhidi ya Biashara United katika mechi zilizocheza uwanja wa Karume Musoma
Tangu Biashara walipopanda daraja, wamekutana na Yanga uwanja wa Karume mara mbili, wameshinda mchezo mmoja na kutoka sare mchezo mwingine
Hivyo mchezo wa Jumamosi, Kocha Cedric Kaze atakuwa na jukumu la kuhakikisha anaandikisha historia mpya kwa kuipa Yanga ushindi wake wa kwanza hapo Musoma
Vijana wa Yanga wako 'onfire' baada ya kushinda mechi sita mfululizo ligi kuu, huu ni mchezo mwingine ambao hesabu zote zimeelekezwa katika 'kusepa' na alama zote tatu
