Jana ilisambaa 'clip' ya video ikimuonyesha Afisa Habari wa klabu ya Simba Haji Manara ambaye ni Mjumbe wa Kamati ya Hamasa Stars akiwatahadharisha mashabiki watakaoishangilia Tunisia itakapokuja kucheza na Tanzania mchezo wa kusaka tiketi ya kushiriki fainali za Afcon 2021
Manara alisema watu hao hawatakuwa Wazalendo na watastahili kuchukuliwa hatua na Mamlaka za Serikali itakapotokea wameingia uwanjani kuishangilia Tunisia
Kwa siku za karibuni baadhi ya mashabiki wa Yanga wamepaza sauti zao kutangaza kutoiunga mkono TFF na kuwa tayari kuishangilia Tunisia itakapokuja nchini kutokana na kile wanachokiita dhurma zinazofanywa na TFF kwa timu yao
Kumekuwa na malalamiko ya muda mrefu kuhusu hali ya upendeleo ambao Wanayanga wanadhani TFF wanaifanyia klabu ya Simba waziwazi
Yapo matukio mengi tu ambayo yanaweza kuthibitisha tuhuma za Wanayanga kwa TFF
Sakata la karibuni la winga Bernard Morrison ni mfano hai. Pamoja na Yanga kufungua madai lukuki kuhusu uhalali wa mkataba wa mchezaji huyo na Simba, hakuna chochote kilichofanyika
Ikumbukwe hadi wakati huu, kwenye mfumo wa usajili wa FIFA Morrison anatambulika kuwa mchezaji wa Yanga
Lakini pia Yanga imefungua malalamiko mengi TFF huko nyuma lakini huwa hayafanyiwi kazi. Ni juzi tu TFF imekanusha tuhuma hizo ambazo ziliibua mijadala mingi kwenye mitandao ya kijamii
Manara alikwenda mbali zaidi kwa kutumia hoja ya kuwa wakati TFF ilipokuwa chini ya Rais Jamal Malinzi Simba nao walikuwa na malalamiko mengi lakini hawakuwahi kususia kuiunga mkono timu ya Taifa
Hoja hii ni sawa na kuhalalisha kile kinachofanywa na TFF dhidi ya Yanga eti kwa kuwa hata Malinzi aliwafanyia Simba. Hivyo Wanayanga hawapaswi kulalamika hata ikitokea wameonewa waziwazi!
Nadhani njia sahihi ya kumaliza sintofahamu iliyopo ni wadau kukutanishwa kuzungumza changamoto zilizopo na kutafuta suluhisho
Wanayanga ni Wazalendo kwani miaka yote wameiunga mkono timu ya Taifa, yanayotokea sasa ni katika kujaribu kutafuta njia TFF waweze kusikiliza malalamiko yao kwani yaonekana njia zote za kawaida zimekwama
