Mabingwa wa kihistoria Tanzania Yanga wametakata uwanja wa Benjamin Mkapa leo wakifanikiwa kuibuka na ushindi wa mabao 3-0 dhidi ya Coastal Union
Yanga iliuanza mchezo huo taratibu kwenye kipindi cha kwanza, wakiwapa nafasi Coastal Union kutawala kwa muda mwingi
Mabadiliko yaliyofanywa wakati wa mapumziko kwa kuwaingiza Haruna Niyonzima na Deus Kaseke kuchukua nafasi za Zawadi Mauya na Kibwana Shomari yalibadili kabisa taswira ya kikosi cha Yanga
Carlinhos fundi huyu kutoka kule Angola ndiye aliyefungua ukurasa wa mabao leo akiweka kambani bao mahiri kwa kichwa akiunganisha krosi ya Tuisila Kisinda
Haruna Niyonzima 'Baba mzazi' akadhihirisha umuhimu wake kwenye kikosi cha kwanza akiweka kambani bao la pili kwa shuti kali akiitendea haki krosi ya Tuisila Kisinda ambaye aliwachachafya walinzi wa Coastal Union upande wa kushoto
Ulikuwa mpira wa kiwango cha juu uliopigwa ya Yanga katika kipindi cha pili wakiwaacha Coastal Union wasiamini kile walichokuwa wakikishuhudia
Katika dakika ya 64 Yacouba Sogne akafungua akaunti yake ya mabao akiweka kambani bao la tatu akimalizia pasi mpenyezo iliyopigwa na Mukoko Tonombe
Sogne angeweza kuondoka na mpira leo kama ungeweza kutumia nafasi nyingine alizotengenezewa
Kwa ufupi, kiwango kilichoonyeshwa na Yanga kwenye kipindi cha pili ni salamu tosha kwa wale waliokuwa wakiibeza Yanga
Ni wazi Yanga iko kwenye mwelekeo sahihi, ule msemo wa kocha msaidizi Juma Mwambusi kuwa kuna timu zitakuja kupigwa bao nane, dalili zinaanza kuonekana
