Kocha Mkuu wa Yanga Zlatko Krmpotic amewapongeza wachezaji wa kikosi chake kwa kupambana kwa muda wote kuhakikisha wanaondoka na ushindi katika mchezo wa ligi kuu dhidi ya Mbeya City ambao ulipigwa jana Jumapili kwenye uwanja wa Benjamin Mkapa
Bao la Lamine Moro la dakika ya 87 lililotosha kuihakikishia Yanga alama tatu muhimu
Akizungumza baada ya mchezo huo, Krmpotic alisema vijana wake walihitaji uvumilivu kuweza kumaliza mchezo huo na ushindi
"Pamoja na kuwa sikufurahishwa na namna tulivyocheza, nawapongeza wachezaji wangu walipambana kwa muda wote kuweza kupata matokeo. Haikuwa rahisi kucheza na timu ambayo imeweka wachezaji 10 nyuma ya mpira," alisema Krmpotic
"Kwa wastani sisi tulicheza mpira kwa zaidi ya asilimia 70, muda mwingi tulikuwa eneo la wapinzani wetu, ilihitaji uvumilivu na kutokata tamaa, ni ushindi tulioupigania"
"Bado tuna kazi ya kufanya kwenye timu yetu. Ukiangalia kipindi cha kwanza hatukucheza tulivyotaka, tunapaswa kuweka mpira chini lakini wakati mwingine naelewa wachezaji wangu walilazimika kutumia mipira mirefu"
Krmpotic ana siku tano za kukiandaa kikosi chake kuelekea mchezo dhidi ya Kagera Sugar ambao utapigwa Jumamosi, Septemba 19 kwenye uwanja wa Kaitaba kule Bukoba
