Mwenyekiti wa Yanga Dk Mshindo Msolla amewahakikishia wapenzi, wanachama na mashabiki wa timu hiyo kuwa msimu huu utakuwa wa furaha kwao kutokana na usajili uliofanyika
Pia, Dk Msolla ameishukuru kampuni ya GSM kwa kufanikisha usajili wa wachezaji wazuri hasa wale watano wa kigeni ambao viwango vyao ni hadhi ya Kimataifa
Amesema baada ya kuwashuhudia nyota hao wakicheza kwa mara ya kwanza, pamoja na usajili makini wa wazawa, ana uhakika msimu huu utakuwa wa mafanikio kwa Yanga
"Usajili uliofanyika ni mkubwa sana, nakiri, tangu niingie kwenye uongozi wa Yanga, safari hii tuna kikosi ambacho kitarudisha heshima ya klabu yetu," Dk Msolla alinukuliwa na Mwanaspoti
"Angalia uwezo wa nyota wa kigeni walioonyesha kwenye mchezo wao wa kwanza tu, ni wachezaji bora sana ambao wana kiu ya kutaka kuisaidia Yanga kuweza kufikia malengo yake"
Aidha Dk Msolla amewataka mashabiki wa Yanga kuwa watulivu wakati benchi la ufundi likiendelea kuwaunganisha wachezaji
"Kutokana na usajili mkubwa tuliofanya, sasa ni kama tuna timu mpya, kocha alihitaji angalau siku 10 hadi 15 kuweza kuandaa timu, nadhani tumpe muda. Tumepata makocha wazuri lakini wamekutana na kikosi ambacho ni kipya na kwa bahati mbaya walichelewa kuanza majukumu yao"
Dk Msolla ambaye kitaalamu ni kocha, amesema anatarajia ushindani mkali wa namba kwenye kikosi cha msimu huu kutokana na ubora wa wachezaji
Anaamini ushindani huo utasaidia wachezaji kujituma zaidi ili kuhakikisha wanapata nafasi endelevu kwenye kikosi cha kwanza
