Baada ya Shirikisho la Mpira wa Miguu Tanzania (TFF) kuweka hadharani kalenda ya msimu ujao ligi kuu ya Vodacom ikitarajiwa kuanza Septemba 06 2020, kikosi cha Yanga kinatarajiwa kuanza maandalizi ya msimu mpya wiki ijayo, August 10 imefahamika
Mabingwa hao wa kihistoria kwa sasa wanakamilisha michakato ya usajili lakini wakipanga kulikamilisha zoezi hilo kabla ya timu kuanza mazoezi
Aidha, mtoa taarifa amebainisha kuwa jana mabosi wa Yanga walikutana kupitia barua 64 za maombi ya nafasi ya Kocha Mkuu ambaye anatarajiwa kurithi mikoba ya Luc Eymael aliyetimuliwa wiki iliyopita
Yanga imedhamiria kuanza mazoezi ikiwa tayari na kocha mkuu hivyo mpaka kufikia mwishoni mwa wiki, kocha huyo atakuwa amefahamika
Mabingwa hao wa kihistoria watakuwa na takribani siku 26 kujifua tayari kwa mikiki mikiki ya ligi ambayo wamepania kutwaa ubingwa walioukosa kwa misimu mitatu mfululizo
Lakini pia, kabla ya ligi Yanga itakuwa na tukio kubwa la wiki ya Mwananchi ambalo bado tarehe yake haijawekwa hadharani
