Afisa Habari wa Yanga Hassan Bumbuli amefafanua kuwa kocha Msaidizi wa timu hiyo Charles Mkwasa pamoja na kocha wa makipa Peter Manyika wameshindwa kusafiri na timu mkoani Morogoro kutokana na udhuru na hakuna mgogoro baina yao na kocha mkuu Luc Eymael
Bumbuli aliyeongozana na timu mkoani Morogoro, amesema taarifa nyingi zinazoripotiwa zikidai kuwepo mgogoro baina ya makocha hao hazina ukweli wowote
"Hakuna mgogoro wowote kwenye benchi letu la ufundi kama inavyokuzwa na vyombo vya habari. Kocha wetu Msaidizi (Mkwasa) aliomba asijumuishwe katika safari ya mkoani Morogoro na Iringa kutokana na Afya yake, baada ya kusafiri sana aliomba apumzike apate wasaa wa kufanya vipimo," alisema Bumbuli
"Manyika yeye alipata msiba wa kufiwa na mtoto wa Dada yake hivyo nae aliomba asisafiri na timu. Wote wawili walimpa taarifa kocha (Eymael) ingawa awali hakukubaliana nao kirahisi, lakini mwisho wa siku aliridhia"
“Kwa ujumla hakuna tatizo kubwa ila sema baadhi ya watu wasioitakia mema klabu yetu wanataka kuivuruga. Manyika yeye ataungana na timu baada ya mechi dhidi ya Mtibwa tayari kwa safari ya kwenda kuivaa Lipuli mjini Iringa,”aliongeza Bumbuli
Baadae leo Yanga itashuka kwenye uwanja wa Jamhuri kumenyana na Mtibwa Sugar kisha kuelekea Iringa kukamilisha msimu kwa kuikabili Lipuli Fc
