Wakati mwingine ni vizuri timu inapoteua kocha mkuu aachwe apendekeze watu wa kufanya nao kazi katika benchi lake la ufundi
Utaratibu huu utaongeza uwajibikaji hasa pale timu inapokuwa haifanyi vizuri
Enzi za kocha Mwinyi Zahera, mara kadhaa aliingia kwenye mgogoro na uongozi wa Yanga akipinga kuletewa kocha msaidizi
Alikataa kufanya kazi na kocha Charles Mkwasa kwa kigezo kuwa ni kocha anayemuheshimu sana lakini wana falsafa tofauti
Hata Yanga ilipomteua Meckie Mexime kuwa msaidizi wake Zahera alikataa akiridhika kufanya kazi na Noel Mwandila
Na waliondoka wote pale ajira yake ilipositishwa mwezi Novemba 2019
Tayari kuna minon'gono kuwa kocha Luc Eymael naye hafurahishwi kufanya kazi na baadhi ya watu katika benchi lake la ufundi akienda mbali zaidi kusema anaweza kuondoka yeye kama mapendekezo yake hayatafanyiwa kazi
Eymael alitua Yanga na kocha wa viungo Riedoh Berdien ambaye ndiye aliyepaswa kuwa kocha msaidizi na baadae akamleta daktari mtaalamu wa viungo
Jopo la watu wengine kama kocha msaidizi, kocha wa makipa, Meneja na Mtunza Vifaa aliwakuta hapo Yanga
Hata hivyo inaelezwa Eymael anataka kocha msaidizi ampendekeze yeye pamoja na kocha wa magolikipa nafasi ambazo zinashikiliwa na Charles Boniface Mkwasa na Peter Manyika
Imekuwa ni kawaida kote duniani kocha mkuu anakuwa na uhuru angalau wa kupendekeza kocha msaidizi, kocha wa makipa na wataalam wa viungo
Hii ni kwa kuwa nafasi hizi zinategemeana lazima ziwe na watu ambao wanafahamiana na wanaweza kufanya kazi pamoja
Kunapokuwa na mgogoro kati ya kocha mkuu na kocha msaidizi ni lazima utaathiri mwenendo wa timu
