Pamoja na tambo nyingi za mashabiki wa Simba kuelekea mchezo dhidi ya watani zao Yanga, hakika wanapaswa kuwa na akiba ya maneno kwani mchezo wowote unaozikutanisha timu hizo huwa hautabiriki
Nilimsikia msemaji wa klabu ya Simba Haji Manara, akihojiwa na chombo kimoja cha habari akitamba kuwa kwao mechi ya Jumapili hakutakuwa na habari ya kufungwa, kutakuwa na matokeo ya ushindi tu kwa timu yao
Ukiangalia takwimu, katika misimu mitatu iliyopita, Simba wamepata ushindi dhidi ya Yanga mara mbili tu na Yanga ikishinda mchezo mmoja dhidi yao
Msimu huu Yanga imevuna alama nyingi dhidi ya Simba kwenye ligi, wakishinda mchezo mmoja na kutoka sare mchezo mwingine
Wachezaji wa Yanga wamedhihirisha kuwa hawahofii kabisa kucheza na Simba pengine kuliko mashabiki wa timu hiyo wanavyofikiria
Yanga inayokwenda kucheza na Simba ni tofauti kabisa na ile iliyofungwa na KMC, ikapata ushindi wa taabu dhidi ya Kagera Sugar katika michuano hii ya FA lakini pia ikatoka sare na Azam Fc katika mchezo ambao wengi wanaamini hawakustahili matokeo hayo
Yanga ya 'kariakoo dabi' ni nyingine kabisa, inakuwa na wachezaji 11 wanaofanya kazi ya wachezaji 22 uwanjani!
Ni Yanga ambayo anakabwa mtu na kivuli chake! Ni Yanga ambayo hutaweza kuwaona nyota wa Simba kama kina Chama ambao wamekuwa wakifanya vizuri katika mechi nyingine
Wale viungo wa Yanga pale kati huwa wanakuwa kama vitoto vya mbwa ambavyo vimekutana na ziwa la mama yao baada ya kulikosa kwa muda mrefu!
Saikolojia ya wachezaji wa Yanga hubadlika kabisa pale wanapokutana na Simba, ujasiri unaongezeka na hutashangaa kuona mchezaji yeyote anayepangwa katika mchezo huo, anafanya vizuri
Utakuwa mchezo mzuri kwa mashabiki ku-enjoy kwani ushindani utakuwa mkubwa. Ni mchezo ambao ukanda wote wa Afrika Mashariki utatupia jicho
Wakati Simba wataingia uwanjani wakisaka taji la pili msimu huu, kwa Yanga huu ni mchezo muhimu sana kwao. Mchezo huu umeshikilia nafasi yao ya kushiriki michuano ya Kimataifa msimu ujao. Hakika ni mchezo ambao hawatakubali wafungwe kirahisi
