Baada ya kulazimishwa sare ya bao 1-1 dhidi ya JKT Tanzania jana, kikosi cha Yanga kinarejea jijini Dar es salaam leo kujiandaa na mchezo unaofuata dhidi ya Azam Fc ambao utapigwa Jumapili ijayo katika uwanja wa Taifa
Mabingwa hao wa kihistoria wanahitaji matokeo ya ushindi katika mchezo huo ili kuwapiku wana rambaramba kwenye nafasi ya pili
Kumekuwa na taarifa ambazo bado hazijathibitishwa na Shirikisho la soka Barani Afrika (CAF) kuwa Tanzania inaweza kutoa wawakilishi wanne kwenye michuano ya CAF msimu ujao baada ya Libya kufungiwa
Kama taarifa hizo zitakuwa na ukweli ina maana mshindi wa kwanza na wa pili kwenye ligi watashiriki michuano ya ligi ya mabingwa kama ilivyokuwa msimu uliopita, wakati mshindi wa tatu na bingwa wa michuano ya kombe la Shirikisho la Azam watashiriki michuano ya Shirikisho
Lakini pia, mchezo dhidi ya Azam Fc Jumapili utakuwa wa kisasi kwa Yanga ambayo ilipoteza mchezo wa kwanza kwa kufungwa bao 1-0
