Kocha Mkuu wa Yanga Luc Eymael ameweka bayana kuwa kiungo wa Rayon Sports Ally Niyonzima ni miongoni mwa wachezaji ambao anatamani kuwa nao kwenye kikosi chake msimu ujao
Niyonzima amekuwa akitajwa sana kuelekea jangwani pale dirisha la usajili litakapofunguliwa
Nyota huyo hucheza pamoja na fundi Haruna Niyonzima katika timu ya Taifa, ni chaguo la kwanza katika nafasi ya kiungo mkabaji ambayo Eymael amependekeza aletewe mtu wa kumpa changamoto nahodha Papy Tshishimbi
Eymael ambaye bado anapambana kurejea nchini kutokana na changamoto ya usafiri wa anga huko Ubelgiji, amesema anahitaji kiungo anayeweza kumudu vyema majukumu yake hasa upande wa ulinzi
"Nahitaji kiungo ambaye atakaa katika nafasi yake na kutimiza vyema majukumu ya kulinda safu ya ulinzi. Tumeyaona makosa kadhaa kwenye safu yetu ya ulinzi lakini mengine hayasababishwi moja kwa moja na mabeki. Hivyo tutatumia vyema dirisha la usajili kutatua mapungufu yaliyopo," alisema Eymael
Pamoja na kumudu vyema nafasi ya kiungo mkabaji, Niyonzima anaweza kucheza nafasi ya beki wa kati namba nne na tano
Eymael amefichua kuwa anapendelea wachezaji wanaomudu nafasi zaidi ya moja uwanjani kwani hiyo inamsaidia wakati wa changamoto ya upungufu wa wachezaji kutokana na kadi, majeruhi au kuumwa
