Mghana Michael Sarpong ameingia kwenye orodha ya wachezaji ambao Yanga inaweza kuwasajili kuimarisha kikosi chake kwa ajili ya msimu ujao
Sarpong ni mchezaji huru baada ya klabu ya Rayon Sports kuvunja mkataba wake hivi karibuni pale alipotoa kauli ambayo iliwakera mabosi wa timu hiyo
Huyu Yanga ilijaribu kumsajili mwezi Januari wakati wa dirisha dogo lakini changamoto ya mkataba wake ilitajwa kuwa kikwazo kumnasa
Sarpong alikuwa mfungaji bora wa ligi kuu ya Rwanda msimu uliopita akitupia mabao 16 na msimu huu akiwa ametupia mabao nane kabla ya mkataba wake kuvunjwa
Heritier Makambo yeye anaongoza orodha ya wanaowaniwa na Yanga. Afisa Mhamasishaji wa Yanga Antonio Nugaz alifichua kuwa mabingwa hao wa kihistoria kupitia wadhamini wao GSM, wamemfanya Makambo kuwa chaguo la kwanza katika usajili
Kinachombeba Makambo ni wenyeji wake Yanga licha ya kuwa hakuwa na mwanzo mzuri huko Horoya Ac. Mashabiki wanafahamu uwezo wake kwani alikuwa kinara wa mabao kwenye kikosi cha mabingwa hao wa kihistoria msimu uliopita akifunga mabao 23 kwenye mashindano yote
Hivi karibuni nahodha wa Yanga Papy Tshishimbi akafichua mpango wa Yanga kumuwania mshambuliaji wa FC Lupopo Mpiana Monzizi ambaye ni kinara wa mabao ligi kuu ya Congo akifungana na Jackson Muleka wote wakiwa na mabao 12
Kupitia mawasiliano ya simu, Monzizi alimhakikishia Tshishimbi kuwa msimu ujao anataka kuja Tanzania kucheza Yanga ambayo ilikuwa imeanza mazungumzo na wakala wake
Winga wa AS Vita Tusila Kisinda nae amedokeza kuwa msimu ujao huenda akacheza soka lake Tanzania kunako klabu ya Yanga. Kulingana na gazeti la Mwanaspoti, Kisinda ameipa kipaumbele Yanga licha ya klabu nyingine kubwa kumuwania
Hivi karibuni kocha mkuu wa Yanga Luc Eymael alidokeza kuwa anahitaji angalau wachezaji saba wapya ili kuimarisha kikosi chake kwa ajili ya msimu ujao
Inaelezwa bajeti kubwa zaidi imetengwa kwenye kuimarisha safu ya ushambuliaji ambayo msimu huu imekuwa na mwendo wa kusuasua
Nafasi nyingine ambazo huenda Yanga ikaongeza nguvu ni walinzi wawili (mmoja pembeni mmoja kati) na kiungo mkabaji
