Kocha Msaidizi wa Yanga, Charles Mkwasa, amesema wachezaji wa klabu hiyo wanapaswa kuendelea na mazoezi binafsi bila kuchoka, wakati wakisubiri hali ya janga la corona kumalizika na kocha wao mkuu, Luc Eymael, kurejea nchini kutoka Ubelgiji.
Eymael amekwama kwao kutokana na janga la virusi vya corona lililosababisha safari za ndege za kimataifa kuzuiwa hadi hali itakapokuwa nzuri.
Mkwasa aliyekuwa ocha wa muda wa Yanga baada ya Mwinyi Zahera kutimuliwa, amewataka wachezaji kuepuka kupata virusi vya corona, lakini pia kutosahau programu walizopewa kila mmoja kwa kujiimarisha kwa mazoezi.
"Wachezaji waendelee na mazoezi huku wakijilinda na virusi vya corona, naamini muda sio mrefu kocha atarejea na kutoa maelekezo mengine, wasichoke wapambane kujenga mwili kimazoezi, "alisema Mkwasa.
Baadhi ya wachezaji wa Yanga wameonekana kuitikia wito wa kufanya mazoezi wakiwa nyumbani kwa muda mrefu sasa.
Hadi ligi inasimama, Yanga ilikuwa katika nafasi ya tatu kwa pointi 51, nyuma ya Azam inayoshika nafasi ya pili kwa pointi 54 na vinara Simba wakiongoza kileleni kwa pointi 71.
