Nyota wa zamani wa Yanga Obrey Chirwa mkataba wake na Azam Fc unaelekea ukingoni na kuna taarifa za chinichini kuwa mwamba huyo kutoka Zambia ameomba kurejea Yanga
Inaelezwa huko Azam amegomea mazungumzo ya mkataba mpya akitaka jambo hilo lifanyike mwishoni mwa msimu
Chirwa alisajiliwa Yanga mwaka 2015 wakati huo mabingwa hao wa kihistoria wakinolewa na kocha Hans van Pluijm
Inaelezwa ndiye mchezaji ghali zaidi kununuliwa Tanzania kutoka nje ya nchi katika miaka ya karibuni ambapo wakati huo Mwenyekiti wa Yanga Yusufu Manji alitoa zaidi ya dola laki mbili kumsajili
Hakuwa na mwanzo mzuri, lakini baadae alikuwa mshambuliaji tegemeo kwenye kikosi cha Yanga
Hata hivyo Chirwa hakuwa mchezaji mvumilivu kwani aligoma kucheza au kusafiri na timu pale alipocheleweshewa mshahara
Miaka mitatu iliyopita ilikuwa migumu sana kwa Yanga kutokana na changamoto za kiuchumi
Mwaka 2018 Chirwa aligoma kuongeza mkataba wake na kuamua kutimkia nchini Misri na kujiunga na timu ya daraja la kwanza
Hata hivyo huko mambo hayakumuendelea vizuri, akarejea dirisha dogo mwishoni mwa mwaka 2018 na akaomba kurudi Yanga
Mwinyi Zahera aliyekuwa kocha wa Yanga akaweka ngumu kumpokea licha ya kumalizana na mabosi wa Yanga akihofia asingedumu kwa kuwa Yanga ilikuwa bado haiko sawa kiuchumi
Zahera akamgomea tena usajili wa dirisha kubwa uliopita akitoa sababu zilezile kuwa Yanga itakapokuwa na changamoto ya fedha atawasumbua
Lakini kwa sasa baada ya GSM kuchukua majukumu ya kugharamia mahitaji ya timu ikiwemo usajili na kulipa mishahara ya wachezaji, pengine unaweza kuwa muda sahihi kwa Chirwa kurejea tena Jangwani
