Wadhamini wa klabu ya Yanga kampuni ya GSM wamepanga kuipeleka timu hiyo nje ya nchi kuweka kambi ya maandalizi kwa ajili ya msimu ujao, imefahamika
Hata hivyo uamuzi huo utategemea na mwenendo wa mapambano ya ugonjwa ya corona ambao umesitisha shughuli zote za michezo duniani
Mmoja wa viongozi waandamizi wa Yanga amefichua kuwa GSM wamejipanga kufanya mambo makubwa kuelekea msimu ujao ikiwa ni pamoja na kurejesha utaratibu wa kuweka kambi nje ya nchi
"Maandalizi ya mwaka huu yatakuwa bab'kubwa, wadhamini wetu wameahidi kuipeleka timu nchi yoyote ambayo benchi la ufundi litapendekeza. Kama hii shida ya corona itakuwa imemalizika, basi mwaka huu timu itaenda kuweka kambi nje ya nchi," kilifichua chanzo
Tangu alipojiuzulu aliyekuwa Mwenyekiti wa Yanga Yusufu Manji, mabingwa hao wa kihistoria walishindwa kuendeleza utaratibu wa kuweka kambi nje ya nchi kutokana na uhaba wa fedha
Kwa misimu mitatu iliyopita, Yanga imekuwa ikiweka kambi mkoani Morogoro
Enzi za Manji Yanga iliwahi kuweka kambi nchi za Ubelgiji na Uturuki
