Mshambuliaji wa Yanga, Juma Mahadhi ambaye amekuwa nje kwa muda mrefu kutokana na majeraha, amesema ana deni kubwa na klabu hiyo ambayo ilimnasa kutoka Coastal Union miaka minne iliyopita
Mahadhi anayesubiri kurejea dimbani baada ya janga la corona, ameahidi kupamban kuhakikisha anawapa furaha mashabiki wa Yanga ambao walitarajia kumuona akiisaidia timu kwenye mashindano mbalimbali.
Nyota huyo alisema anaahidi kuendeleza ushindani katika kikosi hicho na kuisaidia Yanga kutimiza malengo yake ya msimu ujao.
"Nina deni kubwa kwa mashabiki wangu pindi Ligi Kuu itakaporejea, nitalipa deni hilo kwa kuendeleza kasi niliyokuwa nayo," alisema Mahadhi.
Alieleza kwa sasa ameshaanza kufanya mazoezi magumu kwa kufuata programu maalumu aliyopewa na aliyekuwa Kocha Mkuu wa Yanga, Mholanzi Hans van der Pluijm.
"Nafanya mazoezi magumu kuuweka sawa mwili wangu ili kujiandaa na ligi, ninaamini Mungu atanisimamia na kurejea katika kiwango changu," Mahadhi alisema.
Aliendelea kuishukuru Yanga kwa kumpa huduma zote muhimu tangu alipoanza kuumwa na madaktari wanaofuatilia afya yake kwa karibu.
"Ninashukuru ninapata ushirikiano mkubwa kutoka katika klabu yangu, mpaka hapa nilipo sasa siwezi kuisema vibaya timu yangu, wanasimamia huduma zote ninazotakiwa kupata za hospitali," Alisema Mahadhi.
Mahadhi alipata janga la kuvunjika mguu kwenye mchezo wa kombe la shirikisho dhidi ya USM Alger August 2018
Nyota huyo alifanyiwa upasuaji wa goti hilo mara mbili kabla ya Yanga kumpeleka nchini India kwa ajili ya matibabu zaidi
