Msimu uliopita pamoja na Yanga kuwa changamoto nyingi, aliyekuwa kocha mkuu wa timu hiyo Mwinyi Zahera aliwawezesha mabingwa hao wa kihistoria kumaliza ligi wakiwa nafasi ya pili baada ya kukusanya alama 86
Mpaka wakati huu wa msimu, Yanga inashika nafasi ya tatu ikiwa imekusanya alama 50 baada ya kushuka dimbani mara 26
Kimahesabu, kocha Luc Eymael anaweza kufikisha alama 86 kama vijana wake watashinda mechi zote 12 zilizobaki
Lakini kutokana na ushindani wa ligi ulivyo, pamoja na mwenendo wa kikosi chake, sio jambo jepesi kwa Yanga kuweza kushinda mechi zote 12 zilizobaki
Eymael ameiongoza Yanga katika takribani mechi 15, ameshinda mechi 8, akipoteza mechi tatu na sare nne
Msimu mzima uliopita Yanga ilipoteza mechi sita na sare tano wakati msimu huu mabingwa hao wa kihistoria mpaka sasa wamepoteza mechi 4 na sare 8
Hata hivyo Eymael takwimu zake zinaweza kupata utetezi kwani alikabidhiwa timu robo ya msimu ikiwa tayari imemalizika
Mabadiliko ya benchi la ufundi pamoja na wachezaji yanaweza kuwa yamechangia kikosi chake kuchelewa kupata muunganiko
