Jambo moja la uhakika ambalo kocha mkuu wa Yanga Luc Eymael amefanikiwa, ni kuwafanya wachezaji wake wafurahie kucheza 'sexy-football' maarufu kama tiki-taka
Yaani ukiwaangalia Yanga walivyocheza dhidi ya Alliance Fc jana, kama wangetumia zile jezi zao zenye rangi ya manjano ungeweza kudhani ni FC Barcelona wakiwa kwenye jezi yao ya ugenini!
Katika michezo ambayo Yanga ilitawala, basi huu dhidi ya Alliance Fc ilifunika!
Kuna wakati Yanga iliweza kupiga mpaka pasi 27 huku wakiongoza umiliki wa mpira kwa asilimia 70 dhidi ya 30 za Alliance
Ndio, changamoto inaweza kuwepo kwenye umaliziaji wa nafasi kwa upande wa washambuliaji lakini ukweli utabaki vilevile kuwa Yanga hii ya Luc ni moto wa kuotea mbali hasa pale wanapoamua kuupiga mpira
Kwanza imebarikiwa wachezaji wengi wenye uwezo mkubwa wa umiliki wa mpira
Feisal Salum, Haruna Niyonzima, Mapinduzi Balama, Mohammed Issa 'Banka', Bernard Morrison, Mrisho Ngasa, Papy Tshishimbi ni aina ya wachezaji ambao mpira ukikaa mguuni unatulia
Ni kama Wanayanga wamechelewa kuanza kupata burudani kutoka kwa timu yao kutokana na mabadiliko ya hapa na pale yaliyofanyika
Lakini bila shaka kama timu hii itabaki hivi mpaka msimu ujao, na dirisha la usajili nguvu zikaongezwa kwenye maeneo yenye mapungufu hasa safu ya ushambuliaji, nadhani furaha itarejea 'mazima' Jangwani
