Uongozi wa klabu ya Yanga umepeleka malalamiko Bodi ya ligi (TPLB) juu ya faini walizopewa katika mechi zao zilizochezwa mwezi uliopita kutokana na kutoridhishwa na jinsi hatua hizo zilivyo chukuliwa dhidi yao.
Akizungumza na waandishi wa habari amepam leo, Afisa habari wa klabu hiyo, Hassan Bumbuli ametoa ufafanuzi wa baadhi ya faini ambazo Yanga haikubaliani nazo
Kuhusu kupigwa faini ya shilingi laki tano kutokana na kutowasilisha majina ya wachezaji katika kikao cha maandalizi ya mechi (pre match meeting) katika mchezo dhidi ya Tanzania Prisons, Bumbuli amebainisha kuwa walipeleka kwa kuchelewa kwakuwa mechi ilihamishwa ghafla kutoka uwanja Sokoine kwenda Samora, Iringa baada ya kutokuwa tayari kuchezewa baada ya mvua kunyesha.
Kuhusu faini ya shilingi laki mbili kwa kutoingia kwenye vyumba rasmi katika mchezo dhidi ya Simba msemaji huyo alisema walipeleka malalamiko Bodi ya ligi kuwa vyumba vyao havikuwa salama na wakaruhusiwa kuingia katika vyumba vya timu B, wameshangaa kuona wamepigwa faini hiyo.
Aidha, kuhusu mashabiki wao kurusha chupa za maji katika mchezo huo ni kutokana na wao kupeleka malalamiko Bodi ya juu ya mambo mbalimbali ambayo wanaona wanaonewa lakini hayafanyiwi kazi
Bumbuli ameongeza kuwa wanashangaa Bodi hiyo kuzuia pesa kutoka kwa mdhamini Vodacom bila kufanya majadiliano na klabu hiyo kitu ambacho ni kinyume na kanuni ambazo wameziweka wenyewe
Katika hatua nyingine, uongozi wa Yanga umemuita mlinda mlango wao Ramadhani Kabwili baada ya kuwatuhumu baadhi ya viongozi wa Simba kuwa walitaka kumpa rushwa apate kadi ya njano ili asicheze mchezo unaofuata dhidi ya timu hiyo
Afisa habari wa Yanga Hassan Bumbuli amesema suala lake ni la jinai hivyo wamemuita ili wakusanye ushahidi ambao wataupeleka kwenye vyombo vya usalama kwa ajili ya hatua za kisheria.
