Mabingwa wa kihistoria Tanzania Yanga wamefanya 'come-back' ya kibabe baada ya kutokea nyuma na kulazimisha sare ya mabao 2-2 katika mchezo wa ligi kuu dhidi ya watani zao Simba
Ulikuwa ni mchezo ambao kikosi cha Yanga kilionyesha ukomavu wa hali ya juu
Mchezo huo ulianza taratibu huku kila timu ikicheza kwa tahadhari kubwa
Simba ilifunga bao la kuongoza kwenye dakika ya 43 kupitia mkwaju wa penati ambao ulikuwa na utata
Mshambuliaji Meddie Kagere alionekana kufanyiwa madhambi nje ya eneo la 18 lakini alimrubuni mwamuzi kwa kujirusha ndani ya box na mwamuzi Jonesia Rukyaa kutoa mkwaju wa penati
Dakika moja baada ya kipindi cha pili Simba ilifunga bao la pili kupitia kwa Deo Kanda
Kuingia kwa bao hilo kuliiamsha Yanga ambayo ilitandaza kandanda safi ya kuweza kujipatia bao la kwanza kwenye dakika ya 50 kupitia kwa Mapinduzi Balama
Dakika tatu baadae, Mohammed Issa 'Banka' akaisawazishia Yanga kwa kufunga bao la pili kwenye dakika ya 54
Uamuzi wa Jonesia kuwapa peneti Simba uliwakera mashabiki ambao walimtupia chupa za maji baada ya mchezo huo kumalizika
Pamoja na mchezo huo kumalizika kwa sare, Yanga ilikuwa bora na hakika wamezima tambo za wapinzani wao Simba waliokuwa wakitamba kuwa wangeondoka na ushindi mnono leo
