Kiungo Haruna Niyonzima amesema anajisikia faraja kurejea nchini kujiunga tena na Yanga, timu aliyoitumikia kwa mafanikio makubwa kabla ya kutimkia Simba mwaka 2017
Niyonzima anatarajiwa kuwasili nchini leo kuungana na mabingwa hao wa kihistoria huku kukiwa na taarifa kuwa anaweza kuwa sehemu ya kikosi kitakachoikabili Simba Jumamosi
Niyonzima amewataka mashabiki kusahau yaliyopita, wafungue ukurasa mpya wa ushirikiano ili kuhakikisha wanafikia malengo ya timu
"Nakuja leo Tanzania kuungana na timu yangu (Yanga), kurejea nyumbani hiyo ni ishara kuwa nipo tayari kuwafanyia kazi kwa hiyo kama kuna makosa yalitokea awali naomba tuyasahau," amesema Niyonzima
"Naomba ushirikiano na upendo kama niliopewa kipindi nakuja kujiunga Yanga kwa mara ya kwanza"
"Nipo tayari hata kwa mchezo dhidi ya Simba japo sipendi kuongelea sana kwa maana mechi hizi zina mambo mengi sana lakini kikubwa ni kujiandaa kisaikolojia"
Niyonzima aliitumia Yanga kwa miaka sita tangu mwaka 2011 kabla ya kutimkia klabu ya Simba mwaka 2017
Anarejea Yanga akiwa mchezaji huru baada ya kumaliza mkataba wa miezi sita na klabu ya AS Kigali
