Katika michezo miwili iliyopita Kaimu kocha mkuu wa Yanga Charles Mkwasa amemtumia beki Mustafa Suleyman safu ya ulinzi wa kulia
Ni baada ya kumkosa Juma Abdul ambaye alichelewa kujiunga na timu kutokana na ushiriki wake wa michuano ya Chalenji na timu ya Taifa ya Tanzania Bara
Lakini pia Paulo Godfrey Boxer aliyekuwa majeruhi kwa zaidi ya miezi mitatu, bado hayuko fiti hivyo Mkwasa analazimika kumtumia kwa tahadhari
Mustafa ambaye tetesi zilishamiri kuwa alikuwa kwenye mpango wa kuachwa dirisha dogo, ni kama amepindua meza kibabe, kwani anaonekana kuimarisha kiwango chake
Katika michezo miwili aliyocheza, ameonekana kutimiza vyema majukumu ya ulinzi
Ana nguvu, kasi na uwezo mkubwa wa kukaba, ni aina ya mabeki ambao wanaweza kupewa kazi maalum ya kukaba washambuliaji wasumbufu
Huyu anaiweza kazi aliyokuwa akipewa beki Abdallah Shaibu 'Ninja' kwenye mechi za Yanga na Simba wakati wa kocha Zahera msimu uliopita
Bila shaka, Mustafa ataendelea kubaki katika viunga vya Yanga kwa muda mrefu kuliko ilivyokuwa ikidhaniwa
