Kikosi cha Yanga leo Jumatatu, Disemba 02 2019, saa kumi jioni kitashuka katika uwanja wa Taifa kuchuana na KMC ukiwa ni mchezo wa ligi kuu ya Vodacom
Baada ya kushinda mechi tano mfululizo, mabingwa hao wa kihistoria watakuwa wakisaka ushindi mwingine muhimu ambao pia utakuwa ushindi wa nne mfululizo kwa kocha Charles Boniface Mkwasa 'Master'
Akizungumzia maandalizi ya timu yake, Mkwasa amesema wamejipanga kuendeleza wimbi la ushindi leo
Hata hivyo amekiri mchezo hautakuwa mwepesi kwani pamoja na kuwa na KMC wana mwenendo wa kusuasua, sio wabaya
"KMC ni moja kati ya timu bora kwenye ligi yetu tangu ipande ligi Kuu"
"Pamoja haijafanya vyema kwenye mechi zake za hivi karibuni, tunatambua sana kuwa mchezo utakuwa mgumu na wa ushindani ila vijana wapo tayari kuwakabili wapinzani wetu na kuondoka na alama zote tatu," amesema Mkwasa
Msemaji wa Yanga Antonio Nugaz amewataka mashabiki wa timu hiyo kujitokeza kwa wingi uwanja wa Taifa kuiunga mkono timu yao
Ametaja viingilio vya mchezo huo VIP A ni Tsh 15,000/-, VIP B na C ni Tsh 10,000/- na Mzunguuko ni Tsh 3,000/-
Aidha Nugaz amesema kampuni ya GSM ambao ni wadhamini wa Yanga, wameweka mezani Tsh Milioni 10 kwa ajili ya wachezaji kama wataibuka na ushindi kwenye mchezo huo
Umekuwa ni utaratibu GSM kutoa kiasi hicho cha fedha kwa kila mchezo wa ligi ambao Yanga inashinda
Tayari wametoa Tsh Milioni 50 ushindi mechi dhidi ya Coastal Union, Mbao Fc, Ndanda Fc, JKT Tanzania na Alliance FC
