Kikosi cha Yanga leo kimefanya mazoezi ya mwisho kwenye uwanja wa Taifa kuelekea mchezo wa ligi kuu dhidi ya KMC
Mchezo huo ambao utapigwa kesho Jumatatu Disemba 02, umehamishiwa uwanja wa Taifa kutoka uwanja wa Uhuru ambao ulitarajiwa kupigwa awali
Kaimu kocha mkuu wa Yanga Charles Mkwasa amesema wamefanya maandalizi mazuri, wana matumaini makubwa ya kushinda mchezo huo
Huo utakuwa mchezo wa nne Mkwasa anakiongoza kikosi cha Yanga tangu akabidhiwe timu mapema mwezi huu
Ameshinda mechi zote tatu zilizopita dhidi ya Ndanda Fc, JKT Tanzania na Alliance Fc
Katika mchezo huo Yanga itawakosa nyota wake wanne Abdulaziz Makame, Feisal Salum, Mohammed Issa 'Banka' na Ally Ally ambao wako na timu ya Taifa ya Zanzibar
Paulo Godfrey na Juma Mahadhi nao wanatarajiwa kukosekana
Matokeo ya ushindi kesho yataipandisha Yanga hadi nafasi ya tano kwenye msimamo wa ligi
