Yanga imeendeleza rekodi ya ushindi chini ya kocha Charles Mkwasa baada ya kuichapa JKT Tanzania mabao 3-2 katika mchezo uliopigwa uwanja wa Uhuru
Mchezo huo uliokuwa na ushindani mkali, uliilazimu Yanga kufanya kazi ya ziada kulinda ushindi wake kwenye kipindi cha pili
Pamoja na kuwa bora zaidi kwenye kipindi cha kwanza, makosa ya hapa na pale yaliyofanywa na safu ya ulinzi, yaliiacha Yanga ikienda mapumziko kwa uongozi wa mabao 3-2
Ilitangulia kufunga bao la kuongoza kupitia kwa Patrick Sibomana 'PS' kabla Adam Adam hajaisawazishia JKT Tanzania dakika chache baadae
Bao la pili la Yanga liliwekwa kimiani na Juma Balinya kisha David Molinga kuongeza bao la tatu kupitia mpira wa adhabu nje kidogo ya 18
Hata hivyo Danny Lyanga alipunguza uongozi wa Yanga na kubaki tofauti ya bao moja kwenye dakika ya 45 akifunga bao rahisi lililotokana na safu ya ulinzi kutokuwa makini
Katika mchezo huo kiungo Mapinduzi Balama alipata majeraha na nafasi yake kuchukuliwa na Mohammed Issa 'Banka'
Baadae Abdulaziz Makame na Mrisho Ngasa waliingia kuchukua nafasi za David Molinga na Patrick Sibomana
Ushindi huo umeifanya Yanga ifikishe alama 13 baada ya kushuka dimbani mara sita
Imepata ushindi katika michezo yote minne iliyopita
