Nahodha wa Yanga Papy Tshishimbi amesema 'ana-enjoy' kucheza namba sita na amefurahi baada ya Kaimu Kocha Mkuu wa Yanga Charles Mkwasa kumrudisha katika nafasi hiyo
Tangu Mkwasa akabidhiwe majukumu ya kuionoa Yanga, moja ya mabadiliko aliyofanya ni kumrudisha Tshishimbi namba sita
Wakati wa kocha Mwinyi Zahera, Tshishimbi alitumika kama mchezaji kiraka wakati mwingine akicheza namba 10
Mwenyewe amesema pamoja na kuwa tayari kucheza nafasi yoyote ambayo atapangwa na kocha, lakini namba sita ndio ya kwake zaidi
"Mimi naweza kucheza popote ambapo kocha ananiambia nicheze, lakini kuna namba yangu ambayo nikicheza na-enjoy," Tshishimbi aliwaambia waandishi wa habari baada ya mchezo dhidi ya Coastal Union
"Kocha Mkwasa wakati nakuja Yanga yeye alikuwa Katibu Mkuu, anafahamu na alikuwa anapendelea nikicheza namba sita, nimefurahi kuwa amenirudisha kucheza nafasi hiyo"
"Nikicheza namba sita nakuwa huru, kwa sababu ni nafasi ninayopenda zaidi kucheza"
Tshishimbi alifunga moja ya mabao ya Yanga kwenye ushindi wa mabao 3-1 dhidi ya Coastal Union
