Licha ya Yanga kutopewa nafasi kuelekea mchezo wa marudiano dhidi ya Pyramids Fc ambao utapigwa Jumapli, Novemba 03 huko Misri, Yanga inaweza kufanya maajabu
Baada ya kufungwa mabao 2-1 nyumbani, hawapewi nafasi ya kupindua matokeo Misri
Lakini kiuhalisia jambo lolote linaweza kutokea nchini Misri kutokana na mazingira ya mchezo huo
Pamoja na ubora wao, Pyramids Fc wanaweza kufungwa hukohuko kwao
Katika michezo miwili waliyocheza kwenye uwanja wa nyumbani kwenye michuano ya kombe la Shirikisho msimu huu, wameshinda mmoja na kutoka sare mmoja
Waliifunga Etoile Du Congo mabao 4-1 katika mchezo wa hatua ya awali na baadae kulazimishwa sare ya bao 1-1 dhidi ya CR Belouizdad
Pyramids inaonekana kuwa imara sana inapocheza ugenini kuliko nyumbani kwani imeshinda mechi zote tatu za ugenini. Wakati kwa upande wa Yanga ilitinga raundi ya kwanza kwa kushinda ugenini na kupoteza kwa 'bahati mbaya' nchini Zambia kwa bao la kujifunga la Makame
Pyramids wameruhusu bao katika kila mechi waliyocheza nyumbani kwenye michuano hii
Yanga itaingia kwenye mchezo huo ikiwa na hesabu ya kufunga angalau mabao mawili
Ushindi wa mabao 2-0 ugenini utaipeleka Yanga hatua ya makundi
Matokeo ya 2-1 yataupeleka mchezo huo kwanye matuta wakati kama Yanga watapata ushindi wowote wa kuanzia mabao matatu, watafuzu
Jambo jema ni kuwa Yanga sio ngeni kucheza Misri
Katika kipindi cha miaka mitano imeshacheza na Al Ahly na Zamelek kwenye uwanja huo wa June 30
Mchezo wa Jumapili wachezaji wa Yanga watakuwa huru kwani hawana cha kupoteza baada ya kufungwa mchezo wa nyumbani
Kocha Mwinyi Zahera amesema mapema kuwa mbinu za mchezo huo hazitakuwa sawa na walivyocheza mechi ya kwanza
"Tunajua tunapaswa kushinda, haitakuwa rahisi lakini tunaowachezaji ambao wanaweza kutupa matokeo, lolote linaweza kutokea," alisema Zahera
